Steingrímur J. er engin Soffía frænka

Guðni Ágústson, formaður Framsóknarflokksins, vill setja á fót sérstaka þjóðarsáttarnefnd til þess takast á við þann vanda sem blasir við í efnahagslífinu. Formaður Vinstri - grænna segir enga sársaukalausa leið út úr vandanum en forsætisráðherra hvetur þá sem stjórna verðlagi að halda aftur af sér með hækkanir. Utanríkisráðherra sagði formann Vinstri - grænna skorta trúverðugleika til þess að takast á við efnahagsmálin.

Guðni Ágústsson var upphafsmaður utandagskrárumræðu um efnahagsmál á Alþingi í dag. Sagði hann íslensku þjóðarskútuna velkjast um í ólgusjó og framsóknarmenn hefðu raunhæfar leiðir til lausnar. Með samstilltu átaki væri hægt að vinna bug á vandandum og koma í veg fyrir að verðbólga festi sig í sessi. Menn óttuðust að ríkisstjórnin ætlaði að láta reka á reiðanum og auka byrðar á almenning.

Tekur undir gagnrýni á Seðlabankann

Setja þyrfti á fót þjóðarsáttarnefnd með aðkomu stjórnvalda, aðila vinnumarkaðarins og fjármálalífsins til þess að ræða leiðir til aðgerða. Þá þyrfti að endurskoða fjárlög þessa árs. Enn fremur sagðist Guðni ekki skilja hvernig Samfylkingin hafnaði erlendri fjárfestingu fyrir tugi milljarða í Helguvík og á Bakka. Þá vildi að hann að neysluskattar yrðu lækkaðir eða felldir á brott, þar á meðal á eldsneyti og matvæli.

Ef ekki yrði brugðist við yrði kreppan dýpri, sagði formaður Framsóknarflokksins. Seðlabankinn eða ríkissjóður þyrfti að taka lán til að efla gjaldeyrisforða Seðlabankans og styrkja gengi krónunnar. Þá sagðist Guðni taka undir gagnrýni Vilhjálms Egilssonar, framkvæmdastjóra Samtaka atvinnulífsins, um stýrivaxtastefnu Seðlabankans.

Tvíþættur vandi að mati forsætisráðherra

Geir H. Haarde forsætisráðherra benti á að oft hefði verið tekist á um efnahagsmál á þingi í vetur, meðal annars vegna breytinga sem menn hefðu ekki séð fyrir. Benti hann á að nú hægðist um í íslensku efnahagslífi þar sem stórframkvæmdum væri að ljúka. Það væri ekki óeðlilegt og ekki óæskilegt heldur.

Það sem væri nýtt væri að aðstæður á hinum alþjóðlegu fjármálamörkuðum hefðu breyst og bitnuðu á fleirum en Íslendingum. Það hefði þó bitnað á íslenskum fjármálastofnunum með óeðlilegri hætti en víða annars staðar og gerði þeim erfiðara fyrir að stunda sín viðskipti. Vandinn væri tvíþættur, annars vegar væri lánsfjárkreppa um allan heim sem þýddi að íslenskar fjármálastofnanir ættu í meiri erfiðleikum með að afla sér lausafjár og hins vegar hefði komið upp óvæntur skortur á gjaldeyri svo krónan hefði fallið.

Þá sagði forsætisráðherra að gengisfellingin hefði haft gamalkunn áhrif. Hún styrkti útflutningsgreinarnar en hefði einnig í för með sér að innfluttar vörur hækkuðu í verð. Sagði Geir að ef gengisbreytingin væri tímabundin þannig að hún gengi að einhverju leyti til baka á næstunni þá skoraði hann á þá sem vald hefðu á verðlagi að halda aftur af sér. Ef gengisbreytingin væri varanleg kæmi kúfur í verðlagsmálum sem gengi vonandi niður síðari hluta árs.

Dýr sofandaháttur ríkisstjórnarinnar

Steingrímur J. Sigfússon, formaður Vinstri - grænna, benti á að flokkur hans hefði lagt fram frumvarp um aðgerðir í efnahagsmálum. Þar hefði meðal annars verið lagt til að styrkja gjaldeyrisforða Seðlabankans um 80 milljarða og eigið fé bankans um 40 milljarða. Hins vegar hefði ástandið versnað svo hratt frá því að frumvarpið var lagt fram að það væri með öllu óvíst að þetta dygði. Þetta væri til marks um það hversu dýr sofandaháttur ríkisstjórnarinnar væri að verða.

Ummæli forsætisráðherra og utanríkisráðherra fyrir og um helgina bentu til að þau væru að komast til meðvitundar og það væri vel. Steingrímur benti þó á að ástandið gæti versnað umtalsvert hér á landi og því þyrfti að taka á málunum. Það væri engin sársaukalaus leið út úr ástandinu. Þá sagði hann það flótta frá veruleikanum að kenna alþjóðlegum mörkuðum um ástandið hér. Vandinn væri heimatilbúinn.

Þarf að standast áhlaup spákaupmanna

Ingibjörg Sólrún Gísladóttir utanríkisráðherra sagðist hafa verið hugsað til Kardimommubæjarins þegar hún hefði hlustað á reiðilestur formanns Vinstri - grænna. Þar hefðu ræningjarnir rætt um að ræna Soffíu frænku til þess að taka til en á það hefði verið bent hún væri alltaf svo reið. Engu að síður hefði hún verið sótt. Steingrímur J. Sigfússon hefði hins vegar ekki verið sóttur til þess að taka til þar sem hann hefði ekki trúverðugleika í tiltektinni.

Sagði hún fólk þurfa að snúa bökum saman til þess að finna leiðir til þess að verja heimilin í landinu og standa vörð um fjármálakerfið. Ef bankarnir standist ekki áhlaupið muni það koma við allan almenning. Þá tók hún undir með forsætisráðherra að lausafjárkreppan á alþjóðamarkaði hefði hrundið atburðarásinni af stað.

Þá sagði Ingibjörg Sólrún að það eitt af því sem skoðað væri væri að fara í skuldabréfaútgáfu og að styrkja gjaldeyrisforðann en það væri matsatriði hvenær það yrði gert. Það þyrfti að senda skýr skilaboð til þeirra spákaupmanna sem gerðu áhlaup á íslenskt fjármálalíf og sagði utanríkisráðherra að Íslendingar myndu standast það.