Ófærð á Vestfjörðum

Ófært er á Vestfjörðum samkvæmt Vegagerðinni og biðstaða vegna veðurs á Klettshálsi og Steingrímsfjarðarheiði. Þá er verið að hreinsa þæfing af Kleifaheiði og enn fremur er þæfingur í Djúpinu.

Þessu til viðbótar bendir Vegagerðin á að á Austurlandi sé hált á Fjarðaheiði og mjög blint, bæði vegna þoku og skafrennings. Verið er að moka Vatnsskarð eystra en það sækist seint og er tæpast búist við að þar verði orðið opið fyrr en um eða upp úr hádegi. Það er einnig verið að opna Breiðdalsheiði og er vonast til að hún verði orðin fær um klukkan hálfellefu. Annars er víðast hvar snjóþekja á Austurlandi.

Það eru hálkublettir á Hellisheiði og í Þrengslum og þá er hálka á Holtavörðuheiði en hálkublettir á Bröttubrekku, Vatnaleið og Fróðárheiði og eins milli Ólafsvíkur og Stykkishólms. Á Norðurlandi vestra er hált á köflum þótt mikið sé autt en á Norðurlandi eystra er víðast hvar ýmist snjóþekja, hálka eða hálkublettir.