Yfirheyrðir í viðurvist barnaverndaryfirvalda

Lögreglan á Suðurnesjum er búin að hafa uppi á öllum þremur piltunum, sem gengu í skrokk á skólafélaga sínum á lóð Njarðvíkurskóla í gær, þannig að gera þurfti að sárum fórnarlambsins á heilsugæslustöðinni.

Pitlarnir eru allir 15 ára og verða yfirheyrðir nánar í dag í viðurvist barnaverndaryfirvalda. Þeir gáfu þær skýringar í gærkvöldi að þeir hafi verið að hefna sín á fórnarlambinu fyrir að hafa hrekkt yngri bróður eins árásarpiltanna fyrr um daginn.

Lögregla leitar að einum pilti enn, sem tók myndir af atburðinum og setti þær á Netið. Hinir þrír kannast ekkert við hann sem bendir til þess að atvikið hafi ekki verið sett á svið, beinlínis til að mynda það og setja á Netið.

Pilturinn, sem varð fyrir árásinni, er mikið bólginn í andliti og marinn hér og þar á líkamanum en mun hvergi vera brotinn. Málið hefur verið kært formlega, en árásarpiltarnir eru allir orðnir 15 ára, eins og áður sagði, og eru því sakhæfir.