Nýtt frumvarp um eftirlit með hergagnaútflutningi

Utanríkisráðherra hefur lagt fram á Alþingi frumvarp sem felur í sér breytingar á eftirliti með útflutningi á hlutum tækni og þjónustu sem hafa hernaðarlega þýðingu.

Bent er á í greinargerð með frumvarpinu núverandi eftirlit með hergagnaútflutningi sé byggt á tuttugu ára gömlum lögum. Eftirlitið sé til þess að hefta sölu hvers kyns vopna, hefðbundinna, gjöreyðingarvopna og hættulegra hluta, til ákveðinna aðila eða landa eða til þess að forðast að þau nýtist til hryðjuverka eða annarrar ólögmætrar starfsemi.

Þá segir í greinargerðinni að eftir hryðjuverkaárásirnar í Bandaríkjunum 2001 hafi alþjóðleg samvinna um útflutningseftirlit aukist verulega. Lagafrumvarpinu sé ætlað að uppfæra gildandi reglur varðandi eftirlit með útflutningi á hernaðarlega mikilvægri vöru og tækni og að styrkja lagagrundvöll þeirra. Er þetta gert vegna alþjóðlegra skuldbindinga Íslands.

Frumvarpið kveður meðal annars á um skyldu útflytjenda, innflytjenda og vörsluaðila hergagna og hluta til að tilkynna ráðuneyti um útflutning, innflutning og birgðahald samkvæmt nánari reglum sem ráðherra setur. Þá getur ráðherra sett reglur um að tilkynna skuli flugskeytaskot innan íslenskrar lofthelgi.