Ræða við lögregluna um mögulegt hættuástand

Bæjaryfirvöld í Kópavogi hyggjast ræða við lögregluna á morgun um það hvort fleiri sprengjur geti legið í jörðu í Kópavogi. Rýma þurfti leikskóla og grunnskóla í dag eftir að 50 kílóa flugvélasprengja fannst á nýbyggingasvæði við HK-völlinn.

„Það var enginn grunur fyrirfram um að þarna væri sprengja og engar heimildir um það fyrirfram að herir bandamanna hefðu verið með einhverja aðstöðu þarna," segir Þór Jónsson, upplýsingafulltrúi Kópavogsbæjar. Því sé ástæða til að kanna málið til hlítar. Þór tekur fram að lögreglan hafi borið lof á viðbrögð þeirra verkamanna sem fundu sprengjuna.