Geir fundaði með seðlabankastjórum í Stjórnarráðinu

Geir H. Haarde forsætisráðherra fundaði með bankastjórum Seðlabankans og efnahagsráðgjöfum í Stjórnarráðinu í dag. Hann sagði það engan krísufund.

Fundarhöld stóðu í nokkra klukkutíma en þeim lauk um klukkan sex. Aðspurður sagði Geir H. Haarde ekki um krísufund að ræða. Hann hefði verið í burtu í nokkra daga í Bandaríkjunum og hefði notað daginn til þess að setja sig inn í það sem hefði verið að gerast síðustu daga. Farið hefði verið yfir málin og sagði Geir ekki óvenjulegt að allir bankastjórarnir þrír hefðu verið á fundi með honum. ,,Það gerist miklu oftar en þið haldið nefnilega, þeir koma hér oft," sagði Geir við fréttamenn.

Geir sagði að atburðir liðinna daga hefðu verið ræddir og aðspurður sagðist hann ekki getað svarað því hvort stórra tíðinda væri að vænta.

Geir vildi lítið tjá sig um þá ákvörðun Seðlabanka Bandaríkjanna að gera ekki gjaldeyrisskiptasamning við Seðlabanka Íslands. Vísaði hann í það sem bankinn hefði sjálfur látið frá sér fara. ,,Það virðist vera einhver misskilningur í gangi um það að Seðlabanki Bandaríkjanna sé eins og einhver kjörbúð sem allir geti bara farið í og valið sér í körfuna. Auðvitað er það ekkert þannig," sagði Geir.