Dómurinn hefði verið slæm tíðindi fyrir tjáningafrelsið

„Ég er mjög ánægð með niðurstöðu dómsins enda hefði verið erfitt fyrir blaðamenn að vinna vinnu sína ef við hefðum verið fundnar sekar í þessu máli og það hefði verið slæm tíðindi fyrir tjáningarfrelsi í landinu," segir Elín Arnar, ritstjóri Vikunnar. Hún og Björk Eiðsdóttir blaðamaður Vikunnar voru í dag sýknaðar af meiðyrðamáli sem Ásgeir Davíðsson eigandi Goldfinger höfðaði gegn þeim, fyrir umfjöllun blaðsins um nektardansstaði.

Upprunarlega stefndi Ásgeir þeim Björk og Elínu auk viðmælanda þeirra, Lovísu Sigmundsdóttur, fyrrverandi nektardansmeyjar, vegna meintra ærumeiðandi ummæla. Hann krafðist fimm milljóna í skaðabætur auk greiðslu málskostnaðar og 800 þúsund króna til að kosta birtingu dóms í málinu í þremur dagblöðum.

Hann féll þó síðar frá kröfugerð á hendur Lovísu, á þeim forsendum að rangt hefði verið haft eftir henni. Dómurinn leit hinsvegar svo á að Lovísa bæri ábyrgð á ummælum sínum í viðtalinu. Þar sem fallið hefði verið frá kröfugerðinni bæri blaðamaðurinn því ekki ábyrgð sem „höfundur greinarinnar", og féllst dómurinn því ekki á að tiltekin ummæli væru dæmd dauð og ómerk.

Þá taldi dómurinn blaðamann hafa sett millifyrirsagnir fram á eðlilegan hátt, og án þess að fara út fyrir mörk tjáningarfrelsis. Elín Arnar ritstjóri þótti sömuleiðis ekki hafa farið út fyrir mörk tjáningafrelsis með framsetningu efnis á forsíðu og í efnisyfirliti. Dóminum þótti því ekki vera skilyrði fyrir miskabótakröfu í málinu. Þarf Ásgeir því að greiða þeim 600 þúsund krónur í málskostnað.

Ásgeir var að vonum ekki ánægður með dóminn, og hugleiðir að áfrýja honum. Hann segist ekki getað séð niðurstöðuna sem sigur fyrir tjáningarfrelsi, ef hann þýðir það að hver sem er sagt það sem honum sýnist um annað fólk.

„Í rekstri eins og ég er í kemur ótrúlegasta fólk til mín, heimtar að fá endurgreiddan pening sem þeir hafa eytt og er með allskonar kröfur og dónaskap. Ég lendi í því að minnsta kosti einu sinni í viku að fólk segist þekkja blaðamann og ætli með málið í blöðin," segir Ásgeir. „Ég hef samt ekki lent í því áður að einhver rugludallur geti labbað inn og sagt hvað sem er um mig," segir Ásgeir og bætir við að yfirleitt hafi blaðamenn reynt að sýna báðar hliðar málsins.