Brot ökumanna í Garðabæ mynduð

Lögreglan myndaði brot 45 ökumanna á Bæjarbraut í Garðabæ í dag. Fylgst var með ökutækjum sem var ekið Bæjarbraut í austurátt, milli Hofsstaðabrautar og Karlabrautar. Á einni klukkustund, fyrir hádegi, fóru 112 ökutæki þessa akstursleið og því ók stór hluti ökumanna, eða 40%, of hratt eða yfir afskiptahraða.

Meðalhraði hinna brotlegu var liðlega 67 km/klst en þarna er 50 km hámarkshraði. Tólf óku á 70 km hraða eða meira en sá sem hraðast ók mældist á 91. Greint var frá þessu á vef lögreglunnar á höfuðborgarsvæðinu.