Wonderbrassmeyjarnar halda sína fyrstu tónleika

Málmblásarasveitin Wonderbrass, sem var fyrst sett saman fyrir tónleikaferðalag Bjarkar, heldur sína fyrstu opinberlegu tónleika næstkomandi mánudag.

Tónleikarnir fara fram í Hásölum Tónlistarskóla Hafnarfjarðar, Strandgötu 51, klukkan 20.30 og verður aðgangur ókeypis meðan húsrúm leyfir.

Á efnisskránni verður meðal annars að finna brassverk eftir G. Gabrielli, Chris Hazell, Pál Ísólfsson og fleiri góða.

Wonderbrass samanstendur af tíu íslenskum brassmeyjum sem hafa nýverið lokið við átján mánaða tónleikaferðalag með Björk Guðmundsdóttur.

Mikill vinskapur hefur tekist með þeim stúlkum og hafa þær nú hafist handa við gerð breiðskífu. Gaman verður að sjá hvað kemur út úr þeirri vinnu en margir góðir samstarfsmenn þeirra munu leggja hönd á plóginn.