Aron Pálmi segir frá misnotkun

Í viðtali við tímaritið Ísafold segir Aron Pálmi Ágústsson frá því hvernig hann misnotaði sjö ára gamlan dreng, þá 12 ára gamall. Aron var dæmdur í tíu ára fangelsi tveimur árum síðar fyrir kynferðisbrotið gegn drengnum, sem varð fyrir sálrænu áfalli við atvikið og átti eftir það erfitt með svefn.

Í tímaritinu kemur fram að Aron var að herma eftir misnotkun sem hann varð sjálfur fyrir af hálfu nágranna síns stuttu áður. Hann segir að brot sitt hafi ekki verið byggt á kynferðislegri hneigð; "Heldur misskilningi mínum um hvað kynlíf væri."

Aron viðurkennir í viðtalinu að hafa ekki verið nógu sannsögull í fyrri réttarhöldunum. Hann var síðan dæmdur í 10 ára fangelsi í seinni réttarhöldunum yfir honum. Í unglingafangelsinu varð Aron sjálfur fyrir ofbeldi og kynferðislegri misnotkun. Hann hefur nú ákveðið að tala um þá reynslu til þess að opna fyrir umræðuna svo breyta megi því sem betur megi fara innan fangelsisveggjanna.

Í haust fékk Aron aðgangað háskólanum í Beaumont þar sem hann leggur stund á hegðunarsálfræði með afbrot unglinga sem aukagrein. Hann hefur takmarkað ferðafrelsi í stofufangelsinu, en í skólanum er hann fulltrúi nemenda sem búa ekki á heimavistinni. Hann var sæmdur verðlaunum í skólanum fyrir baráttu sína gegn dauðarefsingum.

Aron Pálmi losnar úr prísundinni í Texas í ágúst og flytur til Íslands, en hann hefur skráð sig til náms í Háskóla Íslands.