Bachelor-stúlka fækkar fötum á sviði

Feministar eru æfir yfir Supergirl, keppni sem fram fór á skemmtistaðnum Pravda á laugardaginn. Þar fækkuðu ungar konur fötum til að reyna að vinna utanlandsferð. Bachelorstúlkan Silja Ívarsdóttir fór úr öllum fötunum.

„Ætli ég hafi ekki farið aðeins yfir strikið,“ segir Silja Ívarsdóttir, ein þeirra stúlkna sem tók þátt í keppninni Supergirl sem haldin var á skemmtistaðnum Pravda á vegum vefsíðunnar superman.is á laugardaginn.

Á heimsíðunni má sjá stúlkurnar reyna að heilla áhorfendur upp úr skónum, fáklæddar mjög og í eggjandi stellingum. 

Silja er þar á meðal en hún tínir af sér hverja spjörina af fætur annarri þar til hún stendur á sviðinu án allra fata. Af þessu eru teknar myndir sem síðan rata á veraldarvefinn. 

„Ég fékk taugaáfall þegar ég sá þetta þarna inni en mér skilst að það eigi að taka þær út,“ segir hún.

Silja ætti að vera sjónvarpsáhorfendum að góðu kunn en hún var meðal þeirra fljóða sem börðust um hylli Steingríms Randvers Eyjólfssonar í hinum íslenska Bachelor. 

„Ég myndi vilja taka þetta tilbaka, þetta var alls ekki minn stíll,“ segir Silja um frammistöðu sína í keppninni.

„En mér fannst ég þurfa að toppa hinar,“ segir Silja en hafði ekki erindi sem erfiði. Stúlkan sem sigraði heitir Helena.

Félag Feminista var ekki par sátt við þessa keppni. „Þetta er skandall,“ segir Auður Alfífa Ketilsdóttir hjá félaginu þegar hún er innt eftir viðbrögðum sínum við þessu uppátæki.

„En þarf ekki að koma mikið á óvart. Þrátt fyrir hundrað ára afmæli kvennréttindabaráttunnar á laugardaginn sýnir svona lostamenning að mikið starf er enn óunnið,“ bætir hún við.

Auður vill samt ekki gagnrýna stúlkurnar sem tóku þátt heldur segir þær einfaldlega vera aldar upp við sama kynjahverfi og strákarnir sem fíla þetta.

„Þær eiga ekki skilið þessa gagnrýni heldur kerfið sem viðheldur þessari soramenningu.“

Eigandi heimasíðunnar superman.is, Sveinbjörn Gísli Þorsteinsson, segir að hann hafi vissulega orðið var við neikvæða umræðu um keppnina.

„Þetta er fyrst og fremst leikur og það var engin að hvetja fólk til þess að fara úr fötunum,“ segir hann en á heimasíðunni má sjá að keppendum er full frjáls að gera hvað sem er til að vinna hylli áhorfenda, þar á meðal að fækka fötum.

Aðspurður um utanlandsferðina sem í boði var fyrir sigurvegarann segir Sveinbjörn: „Hún er ekki ennþá algjörlega komin á hreint.“