Slapp vel þegar bíll fór þrjár veltur

Ungur karlmaður þykir hafa sloppið vel þegar hann missti stjórn á bíl sínum á Skeiðavegi við Merkurhraun rétt eftir miðnætti í nótt. Bíllinn fór út af veginum og fór einar þrjár veltur að sögn lögreglunnar á Selfossi.

Sjúkrabíll flutti manninn af vettvangi en mun þó ekki hafa slasast alvarlega. Bíll er hins vegar líklega ónýtur. Talið er að maðurinn hafi ekið inn á hálkusvæði inn á veginum án þess að átta sig á því. Lögregla á Selfossi segir að búast megi við hálkublettum víða í sínu umdæmi, sérstaklega í uppsveitum, en morgun fór bíll upp á Hellisheiði til þess að salta veginn þar.