Íslendingar í samkeppni við risafyrirtæki í jarðhitaverkefnum

Alþjóðlegur jarðhitamarkaður vex hratt og þar ríkir mikil samkeppni. Íslensk útrásarfyrirtæki á þessum markaði eru í samkeppni við bandaríska olíurisann Chevron og önnur risastór alþjóðleg fyrirtæki.

Hvað eiga George Bush Bandaríkjaforseti og friðarsúla Yoko Ono sameiginlegt. Jú, það að bæði súlan hennar Ono og heimili Bush í Texas eru knúin af jarðhita, orkulindinni sem menn eru að uppgötva á ný um allan heim af því meiri áhuga sem olíufatið verður dýrara.

Árni Magnússon forstöðumaður jarðhitaverkefna Glitnis segir að um sé að ræða afar áhugaverðan markað, þó að hann sé smár í hlutfalli við markað með aðra orkugjafa. Glitnir opnaði nýlega skrifstofu í New York og þaðan selur bankinn ráðgjöf og fjármögnun á fyrirtæki í jarðhitageiranum.

Bandaríkin eru langstærsti markaðurinn fyrir jarðhita - með tvisvar sinnum meiri raforkuframleiðslu með jarðhita en næsta land, sem er Filippseyjar. Mexíkó, Indónesía, Ítalía, Japan Nýjasjáland og Ísland koma þar á eftir. Fyrirtæki eins og Chevron frá Bandaríkjunum, Enel frá Ítalíu, Ormat frá Ísrael, Contact frá Nýjasjálandi berjast um bitana á þessum markaði.

Samkeppnisumhverfið er hart og óvægið - fyrir fyrirtæki eins og ENEX, sem nú tilheyrir Reykjavik Energy Invest, og er með starfsemi víða um heim. Árni Magnússon segir að íslensk fyrirtæki hafi mikið fram að færa í jarðhitamálum.

Á þessum markaði eru menn sammála um að samkeppnin um hæft starfsfólk sé afar hörð og að í þessum geira gildi að hafa þolinmótt fjármagn. Arður af rekstri jarðorkuvirkjana er nokkuð öruggur - útgjöldin eru mikil í upphafi og tekjurnar mjatlast inn, ekki á einhverjum 0árum heldur áratugum.