Sextán prósent háskólastúdína glíma við einkenni átröskunar

Höfundar nýrrar heimildarmyndar um átröskun segja mikið ráðaleysi í heilbrigðiskerfinu í baráttunni við sjúkdóminn. Nýleg könnun sýnir að um sextán prósent kvenna í Háskóla Íslands glími við einhver einkenni átröskunar. Heimildarmyndin hefur vakið afar sterk viðbrögð en hún var frumsýnd í gærkvöldi.

Myndin fjallar um unga íslenska stúlku sem er illa haldin af átröskunarsjúkdómi.

Því veikari sem stúlkan varð því meira hrós fékk hún úr umhverfinu og jafnvel tilboð um fyrirsætustörf.

Berghildur Bernharðsdóttir, annar höfundur myndarinnar, segir að þúsundir Íslendinga þjáist af þessum sjúkdómi.

Höfundar myndarinnar segja að fjölmiðlar hafi gríðarlega mótandi áhrif á ungar konur og hvetji þær jafnvel til að daðra við átröskun og jafnvel lotugræðgi sem hafi í sumum tilvikum hræðilegar afleiðingar, jafnvel dauða.

Berghildur segir að dánartíðni fólks sem glími við lotugræðgi sé ekki eins há en sjúkdómurinn sé samt mjög alvarlegur. Hann sé afar lúmskur. Í nýlegri rannsókn fannst til dæmis 45% íslenskra fimleikastúlkna þær of feitar þrátt fyrir að um 90% þeirra væru undir kjörþyngd.

Höfundar myndarinnar vilja fyrst og fremst vinna að forvörnum en þær telja að heilbrigðiskerfið hér sinni þessum sjúkómum fráleitt eins vel og það ætti að gera. Í raun sé ráðaleysi ríkjandi innan heilbrigðisgeirans varðandi þennan sjúkdóm.