Dæmdur nauðgari sakfelldur fyrir að nefbrjóta fyrrverandi kærustu

Héraðsdómur Reykjavíkur sakfelldi í dag karlmann á þrítugsaldri, Edward Koranteng, fyrir að hafa slegið fyrrverandi sambýliskonu sína og nefbrotið hana en gerði honum ekki sérstaka refsingu þar sem hann hafði þegar verið dæmdur í þriggja ára fangelsi fyrir nauðgun.

Árás Edwards átti sér stað í mars í fyrra heima hjá félaga hans en þá sló ákærði konuna í andlitið þannig að hún nefbrotnaði. Hann viðurkenndi að hafa slegið konuna en sagði það óhapp. Hann hefði verið í slagsmálum við félaga sinn og óvart slegið konuna sem stödd var í sama herbergi. Þessu mótmælti konan hins vegar. Segir dómurinn þennan ágreining engu breyta um það að Edward hafi slegið konuna og gerst sekur um alvarlega líkamsárás.

Edward Koranteng var dæmdur í þriggja ára fangelsi í Hæstarétti í vor fyrir að nauðga 14 ára stúlku. Þar sem líkamsárásin var framin fyrir uppkvaðningu þess dóms bar dómnum að ákvarða refsingu sem hegningarauka við þann dóm. Bar dómnum því að leggja mat á það hvort Edward hefði fengið þyngri dóm en þann þriggja ára fangelsisdóm sem hann fékk fyrir nauðgunina ef dæmt hefði verið fyrir bæði brotin í einu. Komst dómurinn að því að refsingin hefði ekki orðið þyngri og var honum því ekki gerð sérstök refsing fyrir líkamsárásina.