Telur Íslandshreyfingarfólk hafa áhrif á umhverfisstefnu borgarinnar

Ómar Ragnarsson, formaður Íslandshreyfingarinnar, telur að koma síns fólks í borgarstjórn muni hafa áhrif á stefnu borgarinnar í umhverfis- og stóriðjumálum. Margrét Sverrisdóttir, varaformaður Íslandshreyfingarinnar, verður forseti borgarstjórnar þegar nýr meirihluti tekur við borginni á morgun.

Fimm af sex efstu mönnum á lista F-lista og óháðra fyrir síðustu borgarstjórnarkosningar hafa síðan kosið var gengið Íslanshreyfinga og Margrét Sverrisdóttir sem verður forseti borgarstjórnar er varaformaður Íslandshreyfingarinnar.

Formaður flokksins, Ómar Ragnarsson, er ánægður með að sitt fólk sé komið í meirihluta borginni. Ómar segir að kvöldið áður en að meirihlutasamstarfi sjálfstæðis- og framsóknarmanna var slitið hafi hann fundað með sínu fólki. Ómar segist þó sjálfur ekki hafa unnið að myndun nýja meirihlutans.

Ómar telur að koma Margrétar og Íslandshreyfingarinnar inn í borgarstjórn muni hafa áhrif á stefnu borgarinnar í umhverfismálum. Eitt helsta baráttumál F-listans og óháðra fyrir síðustu kosningar var að flugvöllurinn verði áfram í Vatnsmýrinni og segir Ómar að staðið verði við það.

Ómar leggur áherslu á að Íslandshreyfingin hafi skýra afstöðu í verndun orkulindanna og að þær eigi að vera í eigu þjóðarinnar. Margir hafa óttast hvaða áhrif það hafi á orkulindirnar ef Orkuveitan selur REI en REI á meðal annars hátt í helmingshlut í Hitaveitu Suðurnesja.