Rusl og rottur til ama á Hverfisgötunni

Frá því að húsið á Hverfisgötu 42 var flutt á Bergstaðastræti og gengið var frá sárinu eftir það fyrir framan Samhjálparhúsið hefur heimilisrusl hrúgast upp á lóðinni og því fylgir nú rottugangur. Lúðvík Guðnason mengunnarvarnafulltrúi borgarinnar kynnti sér aðstæður í morgun og segir að eitthvað verði gert í þessu máli strax.

"Við erum að kanna núna hvaðan þetta rusl kemur og munum sjá til þess að það verði fjarlægt hið fyrsta," segir Lúðvík í samtali við Vísi. "Það er alveg ótækt að óþrifnaður á borð við þennan fái að myndast hér."

Lúðvík segir að hann muni seinna í dag hafa samband við heilbrigðiseftirlit borgarinnar og gera því grein fyrir þessu vandamáli.

Að sögn nágranna í grennd við svæðið er óþolandi að þurfa að horfa upp þá sjónmengun sem er að þessu rusli hvað þá að sjá rottur rótandi í ruslinu en fólk vonar að ruslið verði fjarlægt í dag.