Allt að 95% af tekjum hjálparsveita koma af flugeldasölu

Um 70 - 95% af tekjum hjálparsveita, sem heyra undir Slysavarnarfélagið Landsbjörgu, koma af sölu flugelda fyrir áramót. Flugeldamarkaðir þeirra opna á morgun en undirbúningur hefur staðið yfir í margar vikur að sögn Jóns Inga Sigvaldasonar hjá Landsbjörgu. Greint var frá því í Morgunblaðinu í dag að gert væri ráð fyrir að salan myndi aukast um hátt í tvö hundruð tonn frá í fyrra.

„Við höfum ekki flutt meira inn í ár en í fyrra og það eru þá samkeppnisaðilar okkar sem eru að flytja inn meira," segir Jón Ingi. „Ég hef séð að menn eru að auglýsa 30% afslátt af flugeldum. Málið er hins vegar það að flugeldar eru einungis seldir í fjóra daga og maður spyr sig því af hvaða verði er verið að gefa afslátt," segir Jón Ingi. Hann segist fullviss um það að Landsbjörg sé samkeppnishæf varðandi verð annars vegar og hins vegar stærð og gæði flugeldana hins vegar.

Í gær var birt áskorun á vefnum Náttúran.is um að hjálparsveitirnar taki frumkvæði og auglýsi að þær taki við raketturuslinu eftir áramót og sjái til þess að því verði komið til endurvinnslu og fargað á réttan hátt. „Sorpa hefur tekið við leyfum af flugeldunum og þeir eru miklu meiri sérfræðingar í því en við. Við skorum bara á fólk að tína upp rusl eftir sig og skila því þangað," segir Jón Ingi.