Ástæða til að Geir grípi inn í?

Sá styr sem staðið hefur um fyrrverandi borgarstjóra hefur dregið úr trúverðugleika hans segir prófessor í stjórnmálafræði, sem spyr sig hvort ástæða sé til að formaður flokksins grípi inn í málið.

Sundrung hefur einkennt borgarstjórnarflokk Sjálfstæðisflokksins undanfarið. Samkvæmt heimildum fréttastofu eru skiptar skoðanir um stöðu Vilhjálms innan flokksins. Leiddar hafa verið að því líkur að hann hætti sem borgarfulltrúi á næstunni þó hann segist sjálfur ætla að sitja út kjörtímabilið.

Baldur Þórhallsson, prófessor í stjórnmálafræði, segir ljóst að trúverðugleiki Vilhjálms hafi minnkað í augum kjósenda og borgarfulltrúa Sjálfstæðisflokksins. Hann spyr sig hvort það sé komið að því að Geir H. Haarde, formaður Sjálfstæðisflokksins, grípi inn í málið. Sterkur leiðtogi setur sjálfan sig ekki til hliðar og því megi gera ráð fyrir að Geir skipti sér af þessu máli að minnsta kosti á bak við tjöldin.