Lífsnauðsyn að fá meðferðarstofnun fyrir átröskunarsjúklinga

Alma Geirdal, formaður Forma, félags sjúklinga með átröskun, segir lífsnauðsynlegt að koma á meðferðarstofnun fyrir sjúklinga með þennan lífshættulega sjúkdóm. Hún segir rétt að fárveik stúlka með átröskun hafi fengið tilboð um módelstörf hjá Eskimo. Talsmenn Eskimo segja að stúlkan hafi aldrei starfað hjá fyrirtækinu.

Í heimildarmyndinni Lystin að lifa, sem fjallar um unga stúlku sem er langt leidd af átröskun, kemur fram að þegar hún var hvað veikust fékk hún tilboð um fyrirsætustörf hjá módelskrifstofunni Eskimo.

Andrea Brabin, talsmaður Eskimo, sendi frá sér yfirlýsingu í dag þar sem hún segir að fyrirtækið hafi alltaf stutt við heilbrigt líferni og hollt mataræði hjá öllum skjólstæðingum sínum. Hún segir að fyrirtækið hafi staðið fyrir fræðslu um átröskun.

Í yfirlýsingu frá Eskimo segir m.a. eftirfarandi: "Mikil viðhorfsbreyting hefur orðið innan tískuiðnaðarins á undanförnum árum til átröskunarsjúkdóma. Áhugi margra af helstu tískuhönnuðum heims á mjög grönnum fyrirsætum var lengi svartur blettur á tískuheiminum, en margir áhrifamestu aðilarnir í greininni hafa sagt þeim viðhorfum stríð á hendur. Arna Þórsdóttir starfar ekki sem fyrirsæta hjá Eskimo og hefur aldrei gert. Eskimo leitar hinsvegar að fólki í auglýsingar og myndatökur af ýmsu tagi alla daga og því er alls ekki óeðlilegt að starfsmaður Eskimo hafi á einhverjum tíma haft samband við Örnu, eins og þúsundir annarra á undanförnum árum."

Höfundar heimildarmyndarinnar segja að fjölmiðlar hafi mótandi áhrif á ungar konur og hvetji þær jafnvel til að daðra við átröskun og jafnvel lotugræðgi.

Alma Geirdal, talsmaður félags sjúklinga með átröskun, segir að kerfið þurfi að bæta sig verulega því hér sé um lífshættulegan sjúkdóm að ræða. Nauðsynlegt sé að koma á fót meðferðarstofnun fyrir átröskunarsjúklinga, annars verði engin breyting á.