Sóttu veika konu í hlíðar Valahnjúks

Þyrla Landhelgisgæslunnar, TF-GNÁ, lenti nú á fimmta tímanum við Landspítalann í Fossvogi eftir að hafa sótt hollenska konu upp í hlíðar Valahnjúks í Þorsmörk.

Þær upplýsingar fengust hjá Landhelgisgæslunni að beiðni um aðstoð hefði borist um klukkan hálfþrjú vegna konu sem hefði hnigið niður á hnjúknum. Var símasamband slæmt á staðnum en talið var að konan hefði fengið heilablóðfall.

Þyrlan fór í loftið upp úr klukkan þrjú og lenti við hnjúkinn skömmu síðar. Var konunni komið á börur og hún síðan hífð upp í þyrluna sem flaug með hana til Reykjavíkur í kjölfarið. Sem fyrr segir lenti þyrlan við Landspítalann í Fossvogi um klukkan hálffimm.

Ástand konunnar var að sögn Landhelgisgæslunnar stöðugt og útlit fyrir að veikindi hennar væru ekki eins alvarleg og í fyrstu var talið.