Héraðsdómur staðfestir stjórnvaldssekt Skífunnar

Héraðsdómur Reykjavíkur hefur hafnað þeim kröfum Árdegis að fella úr gildi úrskurð áfrýjunarnefndar samkeppnismála um að félagið skyldi greiða 65 milljónir króna í stjórnvaldssekt vegna samkeppnisbrota.

Fram kemur í tilkynningu frá Samkeppniseftirlitinu að í júní fyrra hafi eftirlitið komist að því að Skífan, forveri Árdegis, hefði misnotað markaðsráðandi stöðu sína með því að gera samninga við Hagkaup um sölu á hljómdiskum og tölvuleikjum, annars vegar á árinu 2003 og hins vegar á árinu 2004. Samingarnir hefðu falið í sér einkakaup og samkeppnishamlandi afslætti. Með samningunum hefðu keppinautar Skífunnar verið nánast útilokaðir frá viðskiptum við Hagkaup sem er stór seljandi á m.a. hljómdiskum.

Var um ítrekunarbrot að ræða hjá Skífunni að mati Samkeppniseftirlitsins og var félagið því sektað um 65 milljónir króna. Þeirri ákvörðun áfrýjaði félagið til áfrýjunarnefndar samkeppnismála sem staðfesti ákvörðun Samkeppniseftirlitsins.

Við þetta sættu Árdegismenn sig ekki og leituðu til dómstóla til þess að fá úr því skorið hvort ákvörðun áfrýjunarnefndar væri réttmæt. Héraðsdómur Reykjavíkur felldi svo úrskurð í dag þar sem fallist var á að að samkeppnislög hefðu verið brotin og að álögð sekt væri í samræmi við alvarleg brot málsins.