Samið um flug til Vestmannaeyja

Flugfélag Íslands skrifaði á dögunum undir samning við Vegagerðina um flug milli Reykjavíkur og Vestmannaeyja. Í framhaldi af útboði sem haldið var sl. sumar ákvað samgönguráðherra að fela Vegagerðinni að semja við Flugfélag Íslands um flug á þessari leið.

Í tilkynningu um málið segir að nýr samningur taki gildi þann 01. nóvember 2007 og gildir til loka ársins 2009 en möguleiki er að framlengja samninginn um tvö ár til viðbótar eða til loka ársins 2011. Það er Flugfélagi Íslands mikið ánægjuefni að halda áfram flugi til Vestmannaeyja en félagið tók aftur upp flug á þessari flugleið um miðjan október í fyrra og hefur sinnt því flugi með ágætum árangri undanfarið ár meðan unnið var að útboði og þar með varanlegri samningi.

Flognar verða 15 ferðir í viku á veturna, tvær ferðir alla daga nema föstudaga, þá verða þrjár ferðir farnar. Yfir sumartímann verða 3 ferðir í boði alla daga nema miðvikudaga og laugardaga en þá verða 2 ferðir í boði. Lægsta fargjald á þessari flugleið verður eins og til annarra áfangastaða félagsins kr. 3.990.-