Kristinn H. Gunnarsson: Ríkisstjórnarfundir teboð frekar en stjórnvaldsstofnanir

Kristinn H. Gunnarsson, þingmaður Frjálslynda flokksins, sagði á Alþingi í dag, að ríkisstjórnarfundir væru frekar teboð en stjórnvaldsstofnanir. Ríkisstjórnin hafi einfaldlega ekki vald til að samþykkja fjárheimildir. Hann sagði að það væri grafalvarlegt þegar ríkisstjórnin tæki sér þetta vald án samráðs við Alþingi. Þetta sagði hann í umræðum um Grímseyjaferjumálið svokallaða.

Eins og kunnugt er hefur ríkisstjórnin verið gagnrýnd fyrir að kostnaður við smíði ferjunnar sé þrefalt á við það sem gert var ráð fyrir í upphafi. Steinunn Valdís Óskarsdóttir, formaður samgöngunefndar, sagðist telja að flest sem gat farið úrskeiðis í Grímseyjarferjumálinu hafi farið úrskeiðis.  „Lögmál Murphys birtist okkur í sinni tærustu mynd,“ sagði hún.

Steinunn Valdís gagnrýndi umræðu um málið á þingi og sagði hana frekar vera til þess að fá skylmingar í þinginu fremur en að ná lausn eða læra af málinu. „Lærum af þessu, vöndum áætlanagerð og virkjum eftilitsstofnanir sem eiga að hafa eftirlit með fjárreiðum,“ sagði Steinunn Valdís.

Steinunn Valdís sagðist gera ráð fyrir því að ferjan yrði tilbúinn til siglinga öðru hvoru megin við áramótin og muni kosta um 490 milljónir.