Hafna því að sátt sé um verklagsreglur

Samtök verslunar og þjónustu hafna þeim orðum framkvæmtastjóra ASÍ í Morgunblaðinu í dag að verðkannanir ASÍ séu unnar út frá verklagsreglum sem sambandið og Samtök verslunar og þjónustu unnu saman og sátt sé um.

Í tilkynningu frá samtökunum segir enn fremur að það sé löngu ljóst að ekkert samkomulag sé í gildi á milli félaganna sem sátt sé um og því ekki rétt að vitna í reglur sem búnar hafi verið til á sínum tíma en gildi ekki lengur í neinni sátt á milli aðila.

Deilur hafa verið uppi í fjölmiðlum vegna þeirrar ákvörðunar Haga að segja sig frá verðkönnunum ASÍ. Í bréfi til Grétars Þorsteinssonar, formanns ASÍ, vitnar Sigurður Jónsson, framkvæmdastjóri Samtaka verslunar og þjónustu, til orða Ólafs Darra Andrasonar hjá ASÍ frá því í desember 2005 sem Sigurður segir að sýni glöggt að ekki hafi verið samkomulag um áframhald verðkannana eftir umræddum reglum. Þá er bent á að í júlí síðastliðnum hafi SVÞ gagnrýnt harðlega verðkannananir ASÍ.

„Það kórónar svo vitleysuna í tilvitnuðu viðtali, að framkvæmdastjóra ASÍ þykir greinilega furðulegt að ekki megi bera saman verð epla af ólíkum tegundum í mismunandi verslunum. Segir þetta ekki allt sem þarf að segja um nákvæmni vinnubragðanna?" segir í bréfi Sigurðar Jónssonar til Grétars Þorsteinssonar.