Vilhjálmur mun aldrei segja af sér

Vilhjálmur Vilhjálmsson mun aldrei segja af sér sem oddviti borgarstjórnarflokks Sjálfstæðisflokksins þrátt fyrir að hafa verið harðlega gagnrýndur fyrir framgöngu sína í sameiningarferli REI og GGE. Þetta hefur Vísir frá nánustu samstarfsmönnum Vilhjálms.

Vilhjálmur hvílir nú lúin bein á Kanaríeyjum og hefur verið ómögulegt að ná í hann í síma. Sömu heimildir herma að hann hugsi hluta af samstarfsfólki sínu í borgarstjórnarflokki Sjálfstæðismanna, þeim Gísla Marteini Baldurssyni, Hönnu Birnu Kristinsdóttur og Þorbjörgu Helgu Vigfúsdóttur, þegjandi þörfina fyrir framkomu þeirra í garð hans í þessu erfiða máli.

Hluti af staðfestu Vilhjálms skýrist af því að hann getur ekki hugsað sér að annað hvort Gísli Marteinn eða Hanna Birna komist í oddvitastöðu í flokknum fyrir næstu borgarstjórnarkosningar.