Eins og að Osama Bin Laden sé að koma til landsins

Gríðarlegur viðbúnaður er á Leifsstöð þessa stundina vegna komu félaga úr Hells Angels í Noregi hingað til lands.

Vísir er á staðnum og hefur rætt við fólk sem er að koma úr flugstöðinni.

Einn þeirra skaut á að um 70 lögreglumenn biði komu norsku Hells Angels mannanna, sem samkvæmt heimildum Vísis verða allir handteknir þegar þeir stíga frá borði.

Annar hafði það á orði að ástandið í flugstöðinni væri líkt og Osama Bin Laden væri væntanlegur til landsins.

Siv Friðleifsdóttir, þingflokksformaður Framsóknarflokksins, var í vélinni sem Hells Angels mennirnir flugu í til landsins. Hún sagðist fagna þeim mikla viðbúnaði sem var í flugstöðinni þar sem meðlimir Hells Angels væru ekki velkomnir til Íslands að hennar mati.