Lífeyrisfrumvarpið afgreitt til annarar umræðu á þingi

Fyrstu umræðu um breytingar á lífeyrisgreiðslum æðstu embættismanna þjóðarinnar lauk á alþingi í dag og var málið afgreitt til annarar umræðu og allherjarnefndar. Markmiðið með flutningi frumvarpsins er að alþingismenn, ráðherrar og hæstaréttardómarar njóti sömu lífeyriskjara og ríkisstarfsmenn, en búi ekki við sérstök forréttindi.

Málið flytja þingmennirnir Valgerður Bjarnadóttir, Katrín Júlíusdóttir og Ellert B. Schram en meðflytjendur eru þeir Gunnar Svavarson og Róbert Marshall.

Í greinargerð með frumvarpinu segir m.a. að löggjöfin um stóraukin réttindi fyrrgreindra aðila árið 2003 var allumdeild meðal þjóðarinnar. Með þeim voru æðstu handhöfum framkvæmdarvalds, löggjafarvalds og dómsvalds færð lífeyriskjör sem eru úr takti við það sem tíðkast meðal þjóðarinnar. Frumvarpið gerir ráð fyrir að lífeyriskjör þessara hópa verði færð til þess vegar sem nú gerist hjá starfsmönnum ríkisins.

Síðan segir: „Áhöld hafa verið um hvort eignarréttarákvæði stjórnarskrárinnar verndi þau réttindi sem fólk hefur áunnið sér eða fengið samkvæmt hinum umdeildu lögum. Til að forðast að málið lendi í sjálfheldu málalenginga á grundvelli formsatriða, svo sem tengsla eignarréttarákvæða við löggjöfina frá 2003, er gert ráð fyrir að áunnin réttindi samkvæmt hinum umdeildu lögum skuli í engu skert."