Sektaður fyrir að hafa ekið dópaður í tvígang

Héraðsdómur Suðurlands dæmdi í dag karlmann til að greiða 180 þúsund krónur í sekt og svipti hann ökurétti í fimm mánuði fyrir að hafa ekið undir áhrifum fíkniefna í tvígang árinu.

Fyrra skiptið var í mars en þá var hann gripinn í Garðabæ og fannst lítilræði af amfetamíni á honum. Síðara atvikið átti sér stað í byrjun apríl en þá var hann gripinn í Kömbunum undir áhrifum amfetamíns og áfengis.

Maðurinn mætti ekki við þingfestingu og var dæmt í málinu að honum fjarstöddum. Hann hafði einu sinni áður hlotið sekt fyrir fíkniefnabrot. Greiði hann ekki 180 þúsundin innan fjögurra vikna skal hann sitja í fangelsi í 14 daga.