Hendur vopnaframleiðenda á Hilton á litaðar blóði

Samtök hernaðarandstæðinga gagnrýna harðlega fund stjórnenda vopnaframleiðslufyrirtækisins BAE Systems í Reykjavík. „Vopnaiðnaðurinn er án nokkurs vafa óviðfelldnasta atvinnugrein samtímans," segir í ályktun frá samtökunum.

Þá er bent á að fyrirtæki á borð við BAE byggi afkomu sína á stríðsreksti og blóðsúthellingum. „Hendur þeirra manna sem nú funda á Hilton-hótelinu við Suðurlandsbraut eru litaðar blóði og heimsóknir slíkra manna til Íslands eiga ekki að líðast," segir enn fremur í ályktuninni.

Samtök hernaðarandstæðinga hvetja alla landsmenn til að senda framleiðendum og sölumönnum drápstóla skýr skilaboð, að þeir séu ekki og muni ekki verða aufúsugestir hérlendis.