Líkur á frekari flugtöfum nái Icelandair ekki samkomulagi við FÍA

Millilandaflug Icelandair hefur raskast í dag. Félag íslenskra atvinnuflugmanna segir stjórnendur Icelandair Group bera alla ábyrgð á þeim flugtöfum sem orðið hafa í dag. Líkur eru á að áætlunarflug raskist enn frekar ef ekki nást samningar á næstu dögum.

Á félagsfundi Félags íslenskra atvinnuflugmanna síðastliðinn fimmtudag var ákveðið að flugmenn ynnu enga yfirvinnu heldur færu einungis eftir kjarasamningum. Í dag hafði þessi ákvörðun flugmanna áhrif á flug því aflýsa þurfti flugi til Stokkhólms í morgun. Farþegar voru sendir með vél til Osló sem síðan hélt áfram til Stokkhólms. Þeir sem ekki komust með voru sendir með vél til Kaupmannahafnar í hádeginu. Nú síðdegis var aflýst flugi til Minneapolis í Bandaríkjunum. Guðjón Arngrímsson upplýsingafulltrúi Icelandair segir að búast megi við frekari flugtöfum á næstu dögum. Jóhannes Bjarni Guðmundsson formaður FÍA segir flugtafirnar alfarið á ábyrgð stjórnenda Icelandair því ekkert hafi gengið að ná samkomulagi. Félagsmenn séu ósáttir við að Icelandair ráði til sín erlenda leiguverktaka á sama tíma og þeir segja upp hátt í fimmtíu flugmönnum. Hann ítrekar að flugmenn séu ekki í aðgerðum heldur séu þeir einungis að standa við kjarasamninga og vinni ekki umfram það. Jóhannes segist harma að þetta bitni á farþegum en það veki spurningar um hvort ekki sé nóg af flugmönnum til að ganga vaktir.

Icelandair hefur hvatt FÍA til að leggja málið undir félagsdóm en það hefur ekki verið gert. Jóhannes segir að flugmenn hafi einungis viljað ná samkomulagi við Icelandair án þess að þurfa leita til Félagsdóms.

Hann segir að flugmenn vinni ekki yfirvinnu fyrr en málið verði leyst. Boðað hafi verið til fundar við Icelandair á morgun.