Auglýst eftir leigjendum í samgöngumiðstöð

Það var í ársbyrjun 2005, fyrir tveimur og hálfu ári, sem fyrrverandi samgönguráðherra og þáverandi borgarstjóri náðu samkomulagi sem gerði ráð fyrir að samgöngumiðstöð yrði byggð á Reykjavíkurflugvelli. Skýrt var tekið fram að bygging hennar væri óháð ákvörðun um framtíð Reykjavíkurflugvallar enda væri samgöngumiðstöð ekki aðeins ætlað að þjóna innanlandsflugi heldur einnig rútubílum, bílaleigum og strætisvögnum. Samkvæmt samgönguáætlun og yfirlýsingum fyrrverandi samgönguráðherra er ætlunin að byggja samgöngumiðstöðina á næstu þremur árum í einkaframkvæmd og hefur staðsetning hennar verið ákveðin norðan við Loftleiðahótelið. Flugstoðir vinna að undirbúningi málsins og hafa þær í blaðaauglýsingu í dag auglýst eftir aðilum sem áhuga hafa á húsnæði í samgöngumiðstöðinni. Segir þar að gert sé ráð fyrir að þeir sem koma að farþegaflutningum geti leigt sérstaka aðstöðu í fyrirhugaðri byggingu en auk þess verði húsnæði fyrir ýmiss konar ferðatengda verslun og þjónustu. Áhugasamir eiga að hafa samband við umsjónar- og ráðgjafaaðila fyrir 24. september næstkomandi.