Vilja ganga sem fyrst frá sölu Hitaveitu Suðurnesja

Bæjarstjórn Hafnarfjarðar ákvað í dag að fresta tilllögu fulltrúa Sjálfstæðisflokks um að bærinn seldi hlut sinn í Hitaveitu Suðurnesja til Orkuveitu Reykjavíkur. Oddviti sjálfstæðismanna segir brýnt að bærinn gangi sem fyrst frá sölunni.

„Það var kominn tími til að ýta við þessu ferli," sagði Haraldur Þór Ólason, oddviti Sjálfstæðisflokks í bæjarstjórn Hafnarfjarðar, í samtali við Vísi. „Við viljum að hluturinn verði seldur sem fyrst."

Bæjarfulltrúar Sjálfstæðisflokks lögðu til á bæjarstjórnarfundi í dag að bærinn seldi hlut sinn í Hitaveitu Suðurnesja til Orkuveitu Reykjavíkur. Tillagan er í samræmi við samkomulag sem bæjaryfirvöld í Hafnarfirði, Reykjanesbæ og Grindavík gerðu með sér í júlímánuði síðastliðnum. Söluverðmæti hlutar Hafnarfjarðar í Hitaveitu Suðurnesja nemur um 8 milljörðum króna. Meirihlutinn ákvað þó að fresta afgreiðslu tillögunnar.

Að sögn Haraldar er mikilvægt að gengið sé frá sölunni sem fyrst. Hann segir lítinn tilgang í því að fresta málinu þar sem verðmæti hlutar bæjarfélagsins í hitaveitunni eigi ekki eftir að hækka. „Það er best að selja sem fyrst og svo hægt sé að ávaxta andvirði sölunnar."

Í tillögu Sjálfstæðismanna er einnig gert ráð fyrir því að andvirði sölunnar sé notað til að greiða niður skuldir bæjarfélagsins og lækka útsvar og fasteignaskatta bæjarbúa.