Bláskógabyggð veðursælasta sveitarfélagið

Bláskógabyggð var veðursælasta sveitarfélagið í sumar samkvæmt veðurleik veðurstofu Stöðvar 2 og Vísis. Borgarbyggð var í öðru sæti en Rangárþing Eystra í því þriðja.

Leikurinn stóð frá júní til loka ágústmánaðar. Alls voru um 7 þúsund veðurskráningar skráðar í gagnabankann á meðan á leiknum stóð.

Bláskógabyggð, sameiginlegt sveitarfélag Þingvallahrepps, Laugardalshrepss og Biskupstungnahrepps, reyndist vera veðursælasta sveitarfélagið. Meðal hámarkshiti þar reyndist vera 16,1 gráða og sólskinsstundir 5,6 að meðaltali á dag.

Borgarbyggð varð í öðru sæti með lítið eitt hærri hita en Bláskógarbyggð en færri sólarstundir. Í þriðja sæti kom Rangárþing Eystra. Þar mældist meðal hámarkshiti 16,4 gráður og sólskinsstundir að meðaltali 4,6 klukkustundir á dag.

Að mati Sigurðar Þ. Ragnarssonar, veðurfræðings, var sumarið fyrir sunnan og vestanlands nokkuð betra en norðan heiða. Þó hægviðrasamt hafi verið í sumar um mest allt land hafi verið þokusælt með norðurströndinni og oft fremur svalar.