Kynna niðurstöðu í hugmyndasamkeppni á fimmtudag

Dómnefnd sem skipuð var vegna hugmyndasamkeppni um nýtt skipulag í Kvosinni skilar tillögum sínum á fimmtudag. Þetta kom fram í máli Hönnu Birnu Kristjánsdóttur, formanns skipulagsráðsráðs borgarinnar og formanns dómnefndarinnar, á fundi borgarstjórnar í dag en þar var verið að ræða niðurrif húsanna að Laugavegi 4 og 6.

Eins og greint var frá í fréttum fyrr í sumar ákváðu borgaryfirvöld að óska eftir hugmyndum frá bæði arkitektastofum og almenningi um nýtt skipulag í kjölfar brunans í miðbænum í vor. Skipulagssvæðið er tvískipt. Annars vegar meginsvæði sem er Lækjartorg og byggðin umhverfis það og hins vegar jaðarsvæði sem miðast við Pósthússtræti, suðurhlið Hótel Borgar, Skólastræti, Stjórnarráðið, suðurhlið Tónlistar- og ráðstefnuhússreitsins og Tryggvagötu.

Eigendur húsanna að Austurstræti 22 og Lækjargötu 2, sem skemmdust mikið í brunanum, bíða eftir því hvað kemur út úr hugmyndasamkeppni áður en þeir taka ákvörðun um uppbyggingu á sínum reitum.