Ólafur Ragnar Grímsson, forseti Íslands, flutti í morgun ræðu á alþjóðlegri ráðstefnu um landgræðslu og loftslagsbreytingar sem haldin er á Selfossi. Ráðstefnan er haldin í tilefni af 100 ára afmæli Landgræðslu ríkisins og fjölmargir sérfræðingar og alþjóðlegir áhrifamenn eru meðal þátttakenda.
Fram kemur í tilkynningu frá forsetaembættinu að forsetinn hafi í ræðu sinni lagt til að ráðist verði í alþjóðlega aðgerðaáætlun sem gæti stuðlað að víðtækum aðgerðum í landgræðslu víða um heim og þannig lagt baráttunni gegn loftslagsbreytingum öflugt lið.
Í aðgerðaáætluninni væru meðal annars hugmyndir um hvernig reynsla Íslendinga gæti orðið öðrum að gagni. Hægt væri að koma á fót rannsóknarstöðvum víða um heim, þar á meðal á Íslandi. Þá væri hægt að senda sérfræðinga á svæði þar sem mikil þörf sé á landgræðslu, eins og í Malaví, Sambíu, Gana og Senegal.
