Íslandspóstur má gefa út persónuleg frímerki

Póst- og fjarskiptastofnun hefur heimilað Íslandspósti að gefa út persónuleg frímerki með áletruninni „Bréf 50 g Innanlands" í stað áletrunar um verðgildi. Íslandspóstur óskaði eftir því fyrr á árinu þar sem fyrirtækið hygðist bjóða viðskiptavinum upp á að setja eigin mynd eða velja mynd úr myndabanka á frímerki. Myndin væri prentuð hérlendis inn á forprentaða frímerkjaörk með ákveðnu skilgreindu útliti.

Í erindi sínu til Póst- og fjarskiptastofnunar vísaði Íslandspóstur meðal annars til fordæma í útlöndum og þess að bankarnir væru byrjaðir að bjóða upp á greiðslukort með persónulegum myndum undir nafninu "Mitt kort- hannaðu þitt eigið kort". Þá hefðu símafyrirtækin boðið viðskiptavinum sínum upp á mismunandi hringitóna og skjámyndir í farsíma.

Póst- og fjarskiptastofnun komst að þeirri niðurstöðu að með því að gefa út persónuleg frímerki væri Íslandspóstur að auka valmöguleika viðskiptavina sinna. Þá væri ekki séð notendur póstþjónustu sköðuðust á nokkurn hátt vegna þessa. Þá yrði að telja að þeir öryggisþættir sem tilgreindir væru í erindi Íslandspósts væru fullnægjandi. Féllst stofnunin því á að veita Íslandspósti heimild til að gefa út persónuleg frímerki.