Harma fundarhöld stjórnenda í ógeðfelldum iðnaði

Fundir og kaupstefnur vopnaframleiðenda hér á landi samrýmast ekki því markmiði að kynna Reykjavík sem miðstöð friðar. Þetta kemur fram í yfirlýsingu borgarstjórnarflokks Vinstri grænna. Flokkurinn harmar að Reykjavík sé gerð að vettvangi fundarhalda stjórnenda í þessum ógeðfellda iðnaði.

Yfirmenn vopnaframleiðslufyrirtækisins BAE funduðu á Nordica Hilton hótelinu í Reykjavík í vikunni. Var Ísland valið sem fundarstaður vegna legu landsins mitt á milli Englands og Bandaríkjanna en þaðan komu flestir stjórnendurnir sem funduðu hér.

Fram kemur í yfirlýsingu borgarstjórnarflokks Vinstri grænna að BAE sé stærsti vopnaframleiðandi Evrópu og einn sá stærsti í heimi. Fyrirtækið sé þekkt fyrir að selja vopna til ríkja þar sem takmörkuð virðing er borin fyrir lýðræði og mannréttindum. Nefnd eru lönd eins og Sádí Arabía og Indónesía í því samhengi. Þá segir einnig í yfirlýsingu Vinstri grænna að fyrirtækið hafi setið undir ásökunum um stórfelldar mútugreiðslur til stjórnmálamanna og einræðisherra víða um lönd í tengslum við vopnasölusamninga.

Í yfirlýsingunni segir að borgaryfirvöld hafi á síðustu misserum viljað kynna Reykjavík sem miðstöð friðar. Í því sambandi er minnst á Friðarsúlu Yoko Ono sem sett var upp í Viðey á dögunum. Fundur og kaupstefna vopnaframleiðenda geti ekki samrýmst því markmiði og sömu sögu má segja um ráðstefnur á borð við þá sem hernaðarbandalagið NATO hélt hér nýverið. Þá minnir borgarstjórnarflokkur VG sömuleiða á andstöðu sína við heræfingar í borgarlandinu og "kurteisisheimsóknir" herskipa í hafnir Reykjavíkur.