Bjarni Ármannsson: Niðurstaðan veldur mér þungum vonbrigðum

Bjarni Ármannsson, stjórnarformaður REI, reyndi ekki að dylja vonbrigði sín með ákvörðun Borgarráðs að hafna samruna REI og GGE þegar Vísir ræddi við hann í dag. "Þetta veldur mér þungum vonbrigðum," sagði Bjarni.

Hann sagði að það kæmi sér verulega óvart hversu afdráttarlaus niðurstaðan væri og neitaði því ekki að hún breytti heilmiklu upp á framhaldið. "Við munum nú fara yfir afleiðingar þessarar ákvörðunar og skoða stöðu REI í því ljósi," segir Bjarni.

Aðspurður um hans eigin stöðu segir hann það sama eiga við um hana og stöðu REI. Hana þurfi einfaldlega að skoða.

Bjarni felur það ekki að hann telji ákvörðun Borgarráðs ranga. "Ég er ekki í pólitík en mér virðist sem það sé verið að kasta verulegum fjármunum á glæ með þessari ákvörðun," segir Bjarni.