Full efni til þess að hafna samrunanum

Svandís lagði fram tillögu á borgarráðsfundi í morgun að samruna REI og Geysis Green Energy yrði hafnað og sömuleiðis umdeildum 20 ára þjónustusamning Orkuveitunnar og REI. Hann kveður meðal annars á um að REI fái aðgang að tækniþekkingu OR og forgang á verkefni félagsins erlendis.

Svandís segir að þverpólitísk samstaða sé um það í borgarstjórn Reykjavíkur að hafna samrunanum og segir þetta fyrstu tíðindin frá stýrihópnum um málefni REI. Hann muni þó starfa áfram.

Aðspurð hvort hægt sé að hafna samrunanum í ljósi þess að um lögerning sé að ræða segir Svandís að það séu áhöld um það. „Við teljum að það séu full efni til þess að hafna samrunanum á þeim forsendum sem við blasa. Við teljum að það séu of mikil áhöld um lögmæti gjörningsins og það verður að koma í ljós hvort það dugar. Við teljum með aðstoð okkar færustu lögfræðinga að svo sé," segir Svandís.