Konur með lægri laun en karlar á þingi

Þingkonur á Alþingi eru að meðaltali með nærri sex prósentum lægri laun en karlar á þingi þegar horft er til þeirra þingmanna sem ekki eru ráðherrar. Þettta kemur fram í fréttabréfi Samtaka atvinnulífsins. Þar segir að meðallaun karlkyns þingmanna séu rúmlega 602 þúsund krónur en meðallaun kvenkyns þingmanna rúmlega 34 þúsund krónum lægri á mánuði.

Samtökin segja að með því að beita algengri aðferð við að skýra launamun kynjanna fáist sú niðurstaða að óútskýrður kynbundinn launamunur þingmanna sé 3,7 prósent, þ.e. að sá munur verði eingöngu rakinn til kynferðis.

Þá bendir SA enn fremur á að þegar málið sé skoðað nánar og tillit tekið til álagsgreiðslna þingmanna hverfi þessi óútskýrði launamunur. Karlkyns þingmenn fái álagsgreiðslurnar þær í ríkari mæli en þingkonur. „Vilji Alþingi jafna þennan launamun í gildandi launakerfi, verður það ekki gert nema með auknum hlut þingkvenna í álagsgreiðslum, t.d. með fjölgun kvenna sem eru formenn stjórnmálaflokka í stjórnarandstöðu," segir í frétt SA.

Frétt SA má nálgast hér.