Annríki hjá Selfosslögreglu

Karlmaður var fluttur á slysadeild Landspítalans með höfuðhögg eftir líkamsárás sem hann varð fyrir í sumarbústað skammt frá Selfossi rétt fyrir klukkan þrjú í nótt.

Að sögn lögreglunnar á Selfossi voru nokkrir samankomnir við gleðskap í sumarbústaðnum og lenti tveimur þeirra saman með fyrrgreindum afleiðingum. Þá hafði lögreglan afskipti af ölvuðum manni á veitingastað á Selfossi í gærkvöld.

Maðurinn var keyrður til síns heima og lofaði hann lögregluþjónum því að hann yrði til friðs það sem eftir lifði kvölds. Fáeinum klukkustundum síðar var maðurinn svo kominn til Hveragerðis þar sem hann vatt sér að lögreglumönnum og óskaði eftir því að sér yrði ekið til Reykjavíkur.

Þegar lögreglumenn neituðu því brást maðurinn illa við og lét mjög ófriðlega. Honum var þá ekið á lögreglustöð og fékk að sofa úr sér áfengisvímu í fangageymslum.