Ætla að fylgjast með erlendum starfsmönnum

Jóhanna Sigurðardóttir, félagsmálaráðherra, hefur ákveðið að fara í skipulagt átak til að fylgjast með fyrirtækjum sem hafa erlenda starfsmenn í vinnu. Þetta var niðurstaða fundar sem ráðherra átti með forystumönnum Alþýðusambands Íslands í dag.

Hrannar B. Arnarsson, aðstoðarmaður Jóhönnu, segir að ekki sé búið að ákveða nákvæmlega hvernig átakið verður. Það muni að öllum líkindum felast í einhverskonar vettvangseftirliti. Fylgst verði með starfsemi þeirra fyrirtækja sem ráða til sín erlent vinnuafl. Beitt verði þeim úrræðum sem gildandi lög heimili. Hrannar segir að ráðuneytið muni funda með ASI á næstu dögum til að útfæra betur þetta fyrirhugaða átak.

Málefni erlendra starfsmanna hafa verið í brennidepli eftir að upp komst að starfsmenn á vegum Arnarfells voru ekki með kennitölu og ráðningasamningar þeirra ekki skráðir hjá Vinnumálastofnun.