Fjölgar í strætó eftir að frítt varð fyrir nema

36 þúsund fleiri tók strætó í ágúst síðastliðnum en í sama mánuði í fyrra og nemur aukningin fimm prósentum á milli ára. Vöxtinn má rekja til þess að framhaldsskólanemar fengu frítt í strætó eftir því sem segir í frétt frá umhverfissviði borgarinnar.

Alls voru farnar 755 þúsund ferðir með strætó í ágúst í fyrra en þeim fjölgaði í 791 þúsund í ágúst í ár. Mest var álagið í vögnunum á milli klukkan 7.20 og átta á morgnana en það dreifist betur eftir hádegi og stendur frá hálftvö til sex. Fram kemur í frétt umhverfissviðs að þremur aukavögnum hafi verið bætt við leið 1 og 6 á morgnana vegna aukins álags og þá hefur aukavagni einnig verið bætt við leið 13.

„Almenn ánægja ríkir meðal námsmanna með Frítt í strætó verkefnið, við erum því mjög þakklát fyrir viðtökurnar," segir Pálmi Freyr Randversson, sérfræðingur í samgöngumálum á Umhverfissviði. „Við höfum frétt af mörgum dæmum um að nemendur hafi selt bíla eða frestað bílakaupum vegna þess að þau fá frítt í strætó. Það verður spennandi að bera saman fjölda farþega í strætó milli skólaára."