Páll ber höfuð og herðar yfir norræna útvarpsstjóra í bílamálum

Páll Magnússon útvarpsstjóri ber höfuð og herðar yfir aðra útvarpsstjóra á Norðurlöndunum í bílamálum. Raunar er aðeins einn þeirra, Kenneth Plummer, hjá Danmark Radio með bíl á vegum fyrirtækisins og kemst sá ekki í hálfkvist við Audi Q-7 glæsijeppa Páls upp á 9,2 milljónir kr. Plummer keyrir um á Honda CR-V Executive árgerð 2005 sem kostar um 2,7 milljónir kr.

Qyvind Vassaasen útvarpsstjóri á NRK1 er ekki á bíl á vegum fyrirtækisins og vill ekki gefa upp hvaða tegund af bíl hann á. "Þetta er einkabíll minn og því mitt einkamál. Hinsvegar get ég upplýst að um ódýran fjölskyldubíl er að ræða," segir Qyvind í samtali við Vísi.

Og sænski útvarpsstjórinn á Sveriges Radio, Kerstin Brunnberg, segir að hún keyri ekki bíl. "Við erum með mjög góðar almenningssamgöngur hér," segir Kerstin. Hún lætur þess hinsvegar getið að fyrirrennari sinn í starfinu hafi ekið um á meðalstórum Volvo.

Eins og fram hefur komið í fréttum á Vísi borgar RUV rúmlega 200 þúsund kr. á mánuði fyrir Audi-jeppa Páls.