Segir álagsgreiðslur hafa verið blekkingar

Álagsgreiðslur til leikskólakennara sem borgarráð samþykkti nýlega voru blekking og til þess gerðar að friðþægja samfélagið, segir formaður Félags leikskólakennara. Formaður Leikskólaráðs segir verið að útfæra greiðslurnar svo þær nái líka til leikskólanna.

Nýlega var samþykkt í leikskólaráði að greiða leikskólakennurum álagsgreiðslur sem svigrúm var fyrir innan kjarasamninga. Samþykktin breyttist fyrir borgarráði í lok ágúst og átti þá að ná til allra starfsmanna leikskóla en líka frístundaheimila og grunnskóla.

Greiðslurnar voru skilyrtar þannig að vanta þyrfti minnst 20 prósent starfsmanna en skólarnir yrðu að veita fulla þjónustu. Sem leikskólar hafa ekki heimild til að gera í slíkri manneklu. Björg Bjarnadóttir, formaður Félags leikskólakennara, segir engar fregnir hafa borist af þeim.

Þorbjörg Helga Vigfúsdóttir, formaður leikskólaráðs, sagði í samtali við fréttastofu í morgun að verið væri að útfæra þessar greiðslur og þeirri vinnu yrði lokið í þessari viku. Hún sagði jafnframt að hún hefði gengið úr skugga um að greiðsluramminn yrði útvíkkaður þannig að hann næði líka til starfsmanna leikskóla þrátt fyrir samþykkt borgarráðs.