Dregur úr vöruskiptahalla milli mánaða

Vöruskiptajöfnuður var neikvæður um 12 milljarða í ágúst síðastliðnum samkvæmt bráðabirgðatölum Hagstofunnar. Fram kemur í frétt fjármálaráðuneytisins um málið að vöruskiptahallinn hafi minnkað á milli mánaða en hann var nærri 15 milljarðar í júlí.

Útflutningur í ágúst nam tæpum 18 milljörðum króna meðan flutt var inn fyrir nærri 30 milljarða. Fjármálaráðuneytið segir að ef rýnt sé nánar í innflutninginn megi sjá að innflutningur á fjárfestingarvörum lækki umtalsvert milli mánaða vegna samdráttar í stóriðjuframkvæmdum. Hins vegar eyskst innflutningur á neysluvörum lítillega á milli mánaða, einkum fötum og skóm.

Það sem af er ári er vöruskiptajöfnuður neikvæður um rúma 85 milljarða en það er 20 milljörðum króna minni vöruskiptahalli en á sama tíma í fyrra.