Formaður Vinstri grænna segir framsal ríkisins vera stjórnarskrárbrot

Framsal ríkisins til Landsvirkjunnar á vatnsréttindum við neðri Þjórsá er stjórnarskrárbrot segir formaður vinstri grænna. Flokkurinn hefur leitað álits Ríkisendurskoðunnar á þessum gerningi.

Ríkið er eigandi að 95 prósent vatnsréttinda Hvamms, Holta og Urriðafossvirkjunnar sú núverandi áætlanir Landsvirkjunar um virkjun í Neðri hluta Þjórsár miðast við. Eins og fréttastofa greindi frá í gær, fyrst fjölmiðla, þá framseldi ríkið vatnsréttindum sínum til Landsvirkjunar þremur dögum fyrir síðustu kosningar. Í samkomulagi er gert ráð fyrir að framsalið sé til fimmtán ára en hafi Landsvirkjun ekki sótt um virkjanaleyfi í neðri hluta Þjórsár innan þess tíma sé ríkinu heimilt að fella það úr gildi. Formaður vinstri grænna segir að með samkomulaginu sé verulegum verðmætum afsalað úr hendi ríkisins án nokkurrar heimildar í lögum.

Hluti af samkomulaginu felur í sér að landbúnaðarráðherra sem forráðaaðili ríkisjarðarinnar Þjótanda í Flóahreppi skuldbindur sig til samningaviðræðna við Landsvirkjun um að hún fái jörðina í þágu fyrirhugaðra virkjunarframkvæmda. Áður hefur Flóahreppi verið synjað um að neyta lögvarins forkaupsréttar á jörðinni með vísan til ofangreinds samkomulags.

Samkomulagið var meðal annars undirritað af Árna Mathisen fjármálaráðherra. Ítrekað var reynt að ná í hann í dag en án árangurs. Þá var haft samband við ráðherra og þingmenn Samfylkingarinnar en margir innan flokksins hafa verið andvígir virkjun neðri hluta Þjórsár. Þeir einstaklingar sem fréttastofa ræddi við sögðu málið alvarlegt en voru ekki tilbúnir til viðtals að svo stöddu. Töldu þeir þó líklegt að krafist yrði þess að málið yrði tekið upp á Alþingi eða í það minnsta á ríkisstjórnarfundi.