Styttist í að friðarsúlan lýsi í Viðey

Eftir rétt rúman mánuð verður kveikt á friðarsúlunni svokölluðu í Viðey. Súlan verður vígð á afmælisdegi bítilsins John Lennons þann 9. október næstkomandi en súlan er hugmynd ekkju hans, Yoko Ono, sem von er á til landsins í október.

Gert er ráð fyrir að kveikt verði á súlunni á hverju ári á afmælisdegi Lennons og fær hún að lýsa fram til þess dags er hann féll fyrir morðingjahendi í New York 8. desember.

Kjartan Magnússon, borgarfulltrúi og formaður Menningar- og ferðamálaráðs Reykjavíkurborgar, segir að vinna við súluna sé í fullum gangi. Hann segir steypuvinnulokið og nú sé unnið að því að koma ljósabúnaði fyrir en súlan mun senda ljósgeisla hátt til himins og á að verða tákn fyrir frið á jörð.

Kjartan segir ekki loku fyrir það skotið að súlan fái að lýsa á öðrum tímum ársins. Ekki hafi verið tekin ákvörðun um hvenær kveikt verði á henni en til greina komi að láta hana lýsa á merkisdögum eins og um jól, páska og á Menningarnótt.

Von er á Yoko til landsins í október og mun hún verða viðstödd athöfnina þegar kveikt verður á súlunni í fyrsta skipti.