Íslendingar í nálægð við raðmorðingja í New York

Hrottalegt morð var framið á Carter hótelinu á Times Square í New York síðastliðinn fimmtudag. Margir Íslendingar sem lagt hafa leið sína um New York borg hafa dvalið á hótelinu.

Davíð Jónsson háskólanemi var staddur á hótelinu daginn sem morðið var framið. „Á fimmtudag og föstudag var allt fullt af lögreglumönnum hérna á hótelinu. Á sama tíma voru fulltrúar allra helstu fréttastöðva fyrir utan," segir Davíð. „Í fyrstu vissum við ekki hvað hafði gerst. Starfsmenn hótelsins vildu ekki tjá sig um hvað væri á seyði. Þeir sögðust ekki vita neitt. En fljótlega fór þó að kvisast út meðal hótelgesta að einhver hefði dáið þegar nokkrir gestanna sáu lík borið út," bætir Davíð við. Hann segist síðan hafa fengið það staðfest frá fréttamönnum að einhver hefði verið myrtur. Davíð segist vita til þess að þetta sé ekki í fyrsta sinn sem morð er framið á hótelinu. Fyrir nokkrum árum hafi starfsmaður hótelsins verið kærður fyrir að myrða hótelgest. Davíð kýs að kalla það „Morðhótelið".

Á vef New York Daily News kemur fram að einn maður hafi verið ákærður fyrir morðið. Hann sé 35 ára gamall og heiti Clarence Dean. Hann hafi sennilegast hitt hina myrtu, sem var ung kona, á einkamálasíðu. Svo hafi hann átt fund með henni á Carter hótelinu þar sem hann hafi nauðgað henni og svo myrt. New York Daily News greinir einnig frá því að Dean hafi verið ákærður fyrir að nauðga og myrða háskólanema sem hann kynntist á Netstefnumóti í janúar síðastliðinn. Þá sé hann þekktur barnaníðingur og hafi myrt 12 ára gamla stelpu á miðjum 10. áratugnum.

Davíð ber Carter hótelinu ekki vel söguna og segir að það sé jafn slæmt og samnefndur fyrrverandi forseti Bandaríkjanna.